A Xunta Local de Seguridade analizou a diminución nun 12,5% destes actos en relación ao ano anterior. Así mesmo, abordouse na mesma o dispositivo de seguridade a seguir durante as festas do Entroido.

O Concello de Verín acolleu unha reunión da Xunta Local de Seguridade, co-presidida polo subdelegado do Goberno en Ourense, Roberto Castro, e o alcalde de Verín, Juan Manuel Jiménez, e na que participaron membros dos Corpos e Forzas de Seguridade do Estado e da Policía Local.

Estes últimos foron dando conta na xuntanza dos informes en materia de seguridade cidadá. Deles, destaca que o total de infraccións penais do mes de xaneiro diminuíu un 12,5 % respecto ao mesmo período do ano pasado, e as estatísticas amosan un lixeiro incremento na porcentaxe de esclarecidos, tanto en faltas como en delitos.

Outro dos puntos na orde do día foi o deseño do dispositivo de seguridade cidadá que se establecerá nas festas do Entroido, priorizando o importante eido de colaboración entre a Policía Local do Concello de Verín e as Forzas e Corpos de Seguridade do Estado.

Tras esta reunión o subdelegado do Goberno insistiu no bo facer das Forzas e Corpos de Seguridade e a Policía Local e precisou que “o traballo eficiente e minucioso desenvolvido ata o de agora estase a reflexar na baixada dos índices delictivos da comarca”.