Esta iniciativa, organizada pola Fundación Vicente Risco, inclúe catro concertos que terán lugar durante o 2015 e cuxa recadación será adicada á restauración do histórico piano da dona do escritor.
A Fundación Vicente Risco de Allariz posúe un piano de parede que pertencía á dona de Vicente Risco, María del Carmen Fernández. Un piano case centenario que se encontra en bo estado, polo que decidiu darlle uso. Non obstante, precísase determinadas melloras.
Por ese motivo, para a recadación de fondos para o arranxo e afinación do piano naceu “Petiscos Musicais”, un ciclo de catro
concertos adicado a música de cámara co piano como protagonista e que, durante o ano 2015, se van celebrar na sala onde se atopa este instrumento histórico na Fundación Vicente Risco de Allariz.
Os concertos constarán de dúas partes de 45 minutos aproximadamente cun pequeno descanso de 15 minutos. O abono para os catro concertos é de 40 euros, e o prezo da entrada por cada concerto por separado é de 10 euros, destinados na súa totalidade á reparación do piano. A capacidade da sala é de 35 persoas, polo que terán prioridade aqueles que contraten o abono para as catro citas.
