Desde a Xerencia de Xestión Integrada de Ourense puntualízase que os tempos de espera son menores no hospital verinés, e a satisfacción dos usuarios “moi alta”.
Trala rolda de prensa dada polo PSOE esta fin de semana na que alertaba «das escuras intencións» do Goberno do PP de trasladar aos pacientes desde A Limia ao hospital de Verín, “e non a Ourense, que é a área sanitaria que lles corresponde”, a Xerencia de Xestión Integrada de Ourense quixo puntualizar que Verín pertence á mesma área sanitaria que Ourense e que, en todo caso, a opción de acudir ao hospital verinés é voluntaria por parte do paciente.
Segundo informaron desde a Xerencia de Xestión Integrada, a posibilidade de acudir a determinadas consultas, como endocrinoloxía, no hospital de Verín xa se viña ofrecendo aos pacientes da Limia desde hai varios anos, así como outros servizos, como por exemplo as operación de cataratas. “o nivel de aceptación e de satisfacción é moi alto”, indicaban desde o gabinete de comunicación da Xerencia, engandindo ademais que “non nos constan” reticencias por parte dos profesionais dos centros de saúde da Limia.
Outras vantaxes desta opción son que o tempo de acceso a consultas é máis baixo en Verín e que a determinados concellos da Limia quédalles máis preto o hospital da vila do Támega. Por iso, entenden que esta posibilidade “serve para aproveitar os recursos”.
