A Deputación de Ourense vén de presentar as Escolas Deportivas que terán lugar en 15 concellos da provincia.
É a primeira iniciativa destas características que impulsa o ente provincial nos municipios da provincia, e inicialmente estará destinada á formación deportiva de mozas e mozos de entre 6 e 18 anos nas modalidades de fútbol, balonmán, judo e xadrez. A achega económica da Deputación para o desenvolvemento desta actividade é de 35.000 euros.
A presentación das Escolas Deportivas da Deputación de Ourense tivo lugar no Pazo Provincial, e xunto a Manuel Baltar participaron os delegados provinciais das federacións galegas de fútbol, balonmán e judo, Raúl Rois, José Manuel Pérez e Manuel Montero, respectivamente; o director do Club Xadrez Ourense, Elías González, e o asesor de Deportes da Deputación de Ourense, Bernardino González.
Manuel Baltar afirmou que esta iniciativa “está incluída no Plan Ourense 15-19 e ten como obxectivo promover o deporte federado entre os máis novos, coa coordinación do goberno provincial, os concellos e as respectivas federacións deportivas”.
Inscricións
Os interesados xa poden formalizar as súas inscricións a través das federacións galegas de fútbol, balonmán e judo e no Club Xadrez Ourense, ou ben nos 15 concellos que participan no programa: Esgos, Leiro, O Carballiño e San Cibrao das Viñas (nos que se impartirá a modalidade de xadrez); Cortegada, Maceda, Maside e Xunqueira de Ambía (balonmán); Bande, Cea, Muíños e Pereiro de Aguiar (fútbol) e A Merca, Amoeiro e Baños de Molgas (judo). O custe para cada participante será de 9 euros.
