Este mércores comeza no Coro Alto da Igrexa do Mosteiro de San Rosendo de Celanova o programa de Concertos Didácticos de Órgano que un ano máis impartirá a profesora de órgano do Conservatorio de Música de Ourense, Marisol Mendive. O ciclo está destinado o alumnado dos colexios, institutos e conservatorios de música de toda Galicia.
Nesta sétima edición, ata o próximo día 8 de xuño participarán un total de 27 centros escolares de toda Galicia, coa asistencia de arredor de 1.100 alumnos e alumnas deses centros.
O calendario inclúe tres sesións de concertos en horario de mañá (11, 12 e 13 horas) todos os mércores ata o 8 de xuño.
Os participantes no programa poderán interpretar cos seus instrumentos (frautas e outros) de forma conxunta tres pezas musicais na compaña do órgano. Estas pezas teñen sido preparadas previamente nos seus centros escolares cos profesores de música.
Ademais, terán a oportunidade de coñecer os principais referentes históricos e monumentais de Celanova participando na visita guiada “Celanova, un paseo pola historia de Galicia”.
A esta primeira sesión acudirán estudantes do IES Codade de Antioquía de Xinzo, CP Pablo VI Fátima da Rúa e instituto Moncho Valcarce das Pontes de García Rodríguez.
