O Concello de Barbadás abre o prazo para a inscrición na Aula de Reforzo Escolar para Educación Primaria ata o 23 de setembro.
A Aula de Reforzo Escolar é unha medida educativa, promovida dende a Concellería de Educación, coa finalidade de completar lagoas de coñecemento, repasar contidos concretos traballados en clase (reforzo) e a atención das necesidades do alumnado que o precise. Está dirixida a nenos e nenas matriculados durante o presente curso escolar, 2016/2017, en Educación Primaria (dende 1º ata 6º).
A Aula de Reforzo ofértase en dúas modalidades, a primeira delas como aula de reforzo específico en lingua inglesa e a segunda como aula de reforzo xeral (para o resto de materias). Os solicitantes poderán elixir unha soa das modalidades ou ambas.
Todos os interesados poderán obter máis información na páxina web do concello (www.barbadas.es) e na Área de Educación (teléfono: 988 24 68 85).
Axudas para libros e material didáctico
Ademais, o Concello de Barbadás convoca axudas de 90 euros por escolar, para libros e material didáctico na educación infantil para o curso 2016-2017. Estas axudas están destinadas matriculados en centros públicos e privados en tramos concertados, exceptuando aqueles cursos que se benefician do programa de gratuidade de libros de texto da Xunta de Galicia. As axudas serán incompatibles con calquera outra axuda que puidera percibirse coa mesma finalidade de outras institucións públicas.
