O ciclo desenvolverase os días 5, 12, 19 e 26 no Centro Cultural Marcos Valcárcel e destinará a recadación solidaria á Fundación Diego González Rivas.
O ciclo CatArte regresa en novembro ao Centro Cultural Marcos Valcárcel de Ourense coa súa 12ª edición, unha proposta que combina a cultura vitivinícola do Ribeiro, a música en directo e o compromiso solidario. Organizada polo Consello Regulador da Denominación de Orixe Ribeiro (C.R.D.O. Ribeiro) e o centro cultural, a iniciativa ofrecerá catro sesións durante os xoves 5, 12, 19 e 26 de novembro.
Cada encontro permitirá descubrir os viños de diferentes adegas e colleiteiros da denominación de orixe, acompañados de actuacións musicais e petiscos gastronómicos. A programación busca crear un espazo de convivencia arredor do viño e a cultura, ao tempo que contribúe á promoción dos produtos galegos.
A primeira sesión, o 5 de novembro, contará cos colleiteiros Casal do Canteiro e Pousadoiro, coa actuación musical de Iago Vázquez. O día 12 será a quenda do C.R.D.O. Ribeiro, que presentará os seus viños institucionais nunha xornada que contará coa participación de Lois Alonso, recanteiro de Luar 2026.
O programa continuará o 19 de novembro coa adega Casal de Armán e a actuación da banda Soul&Roll. A última cita, prevista para o día 26, terá como protagonista a Bodega Alanís e contará coa sesión musical de Álvaro Alonso como DJ.
Unha cita con compromiso solidario
A solidariedade volverá ocupar un lugar destacado nesta edición de CatArte. A recadación solidaria da iniciativa destinarase á Fundación Diego González Rivas, entidade á que se busca apoiar no labor humanitario que desenvolve.
As entradas terán un prezo de nove euros e poderán adquirirse a través da plataforma en liña Entradium.
Ao longo das súas doce edicións, CatArte consolidouse como unha proposta que combina a divulgación da riqueza enolóxica galega con diferentes expresións musicais e culturais. O ciclo mantén así a súa aposta por unha programación participativa na que o viño, a música e a solidariedade se unen para ofrecer unha experiencia compartida ao público ourensán.
