A iniciativa, organizada pola Subdelegación do Goberno e o Concello, celebrarase na Sala Valente e require inscrición previa ata o día 3.
A cidade de Ourense acollerá o vindeiro 6 de novembro unha sesión do programa «A Administración preto de ti», na que se expedirán certificados dixitais para facilitar á cidadanía a realización de trámites administrativos por vía electrónica.
A actividade desenvolverase a partir das 10.00 horas na Sala Valente, situada na antiga sede do Banco de España, na rúa do Paseo, número 20. Persoal da Oficina de Información e Rexistro da Subdelegación do Goberno será o encargado de emitir os certificados dixitais de persoas físicas, axudar a instalalos nos teléfonos móbiles e explicar as xestións que se poden realizar con esta ferramenta. Ademais, as persoas asistentes poderán resolver as súas dúbidas de maneira individualizada.
A xornada está aberta a toda a cidadanía, aínda que se dirixe especialmente ás persoas estranxeiras que están a realizar trámites relacionados co proceso extraordinario de regularización de persoas migrantes, nos que se require identificación e sinatura electrónica.
Inscrición ata o 3 de novembro
Para participar é necesario inscribirse previamente antes das 14.00 horas do 3 de novembro. As persoas interesadas poden solicitar información ou formalizar a inscrición a través dos teléfonos 988 75 91 39 e 988 75 91 40, ou mediante o correo electrónico subdelegaciondelgobierno.ourense@correo.gob.es.
O día da sesión será obrigatorio presentar a documentación identificativa correspondente: as persoas españolas deberán levar o DNI orixinal en vigor, mentres que as estranxeiras deberán achegar o pasaporte e o NIE.
Máis de 650 certificados expedidos na provincia
O programa «A Administración preto de ti», impulsado polo Ministerio de Política Territorial e Memoria Democrática, busca achegar os servizos da Administración Xeral do Estado á cidadanía e simplificar a realización de trámites sen necesidade de desprazamentos.
No que vai de 2026, a iniciativa chegou a 15 concellos ourensáns de menos de 8.000 habitantes, onde se expediron arredor de 300 certificados dixitais. A estes súmanse máis de 350 certificados emitidos en sesións destinadas a colectivos específicos, entre eles persoas estranxeiras, persoas con discapacidade e estudantes.
O programa púxose en marcha en novembro de 2022 para achegar os servizos estatais aos municipios sen sedes físicas da Administración Xeral do Estado. Desde outubro de 2024, ampliou o seu alcance a outros colectivos e tamén a concellos de maior poboación que soliciten estas actuacións por circunstancias específicas, como é o caso de Ourense.
