A película, que supón o debut na dirección do actor, será a encargada de clausurar o festival o 3 de outubro no Auditorio Municipal de Ourense.
O Ourense Film Festival (OUFF) recoñeceu El mal hijo, a primeira película como director do actor Jaime Lorente, co Premio Ópera Prima da súa 31ª edición. O filme será ademais o encargado de poñer o peche ao certame na gala de clausura, que terá lugar o vindeiro 3 de outubro ás 20.00 horas no Auditorio Municipal de Ourense.
O anuncio realizouse este mércores durante a presentación do galardón, na que tamén se proxectou o tráiler oficial da película. Con esta distinción, o OUFF continúa coa súa aposta por descubrir novas voces cinematográficas e impulsar o talento emerxente.
O director artístico do festival, Óscar Doviso, destacou o carácter social e autoral da película e a súa conexión coa liña temática do certame. Segundo explicou, El mal hijo aborda cuestións como as adiccións e os conflitos familiares derivados delas, ao tempo que presenta unha proposta cunha marcada personalidade cinematográfica.
Pola súa banda, o asesor de programación do OUFF, César Silva, sinalou que a elección non foi doada debido á calidade das propostas presentadas nesta edición, pero destacou a sorpresa que lles causou a película e o rigor da súa realización. Tamén puxo en valor o traballo do elenco, no que figura a actriz Susi Sánchez.
Un drama rural sobre as feridas familiares
Baseada na novela homónima de Salvador Molina, El mal hijo trasládase a unha contorna rural para abordar a transmisión interxeracional das feridas familiares e o impacto das adiccións no ámbito doméstico.
O reparto está encabezado por Miguel Ángel Puro, Susi Sánchez, Hugo Arbués, Óscar de la Fuente, Abel de la Fuente, Pedro Vega Fabelo e Naiara Carmona. A película conta tamén coa participación do actor ourensán Chechu Salgado, nun papel secundario. Salgado xa fora recoñecido polo OUFF no ano 2017.
Ourense será, segundo a organización do festival, a segunda cidade na que poderá verse a película antes da súa estrea comercial, prevista para o 16 de outubro. Previamente, El mal hijo pasará polo Festival de San Sebastián, onde Jaime Lorente competirá polo premio de Novos Directores.
O cineasta estará presente en Ourense para recoller o Premio Ópera Prima durante a gala de clausura e asistir á proxección do seu debut como director.
Jaime Lorente, por partida dobre no OUFF
A presenza de Jaime Lorente nesta 31ª edición do OUFF será dobre. Ademais de recibir o Premio Ópera Prima por El mal hijo, o actor forma parte do reparto de La silla, película dirixida por Ángel de la Cruz que tamén se poderá ver durante o festival.
O galardón a El mal hijo convértese na cuarta distinción anunciada polo OUFF nesta edición, despois da Calpurnia de Honra, o Premio Chano Piñeiro e o Premio Especial OUFF.
