Neste 2016 poténciase o desfile infantil abríndoo a colexios de toda a comarca da Limia.

O ciclo do entroido máis longo de toda Galicia arrinca este sábado en Xinzo co “petardazo”. Este 16 de xaneiro cando o reloxo da praza Carlos Casares alcance a medianoite lanzarase o foguete que marca o inicio de cinco semanas de troula na capital da Limia.

O programa de festexos foi presentado este xoves no Concello de Xinzo, coa presenza do alcalde, Antonio Pérez, dos concelleiros de Cultura e Festexos, Luis Miguel Gil, e do de Medio Ambiente , Manuel Cabas, de media ducia de membros da comisión, e do autor do cartel, o mozo Esteban Bernárdez.

Ricardo Sieiro, voceiro da comisión, explicou que a súa intención foi presentar “un programa o máis amplo posible que fora do agrado de todos”. O programa é fiel á tradición, mantendo todas e cada unha das citas habituais do ciclo do entroido de Xinzo. Isto é, na fin de semana do 16 e 17 de xaneiro, “petardazo” e Fareleiro (o domingo a partir das 16:30 h na praza Maior). A seguinte fin de semana (23 e 24 de xaneiro), aforcamento do Meco (sábado, 19:30 horas desde a praza de Oriente á praza Maior) e  Oleiro (domingo, con oleiro infantil ás 13 h e sénior ás 17 h). Esta será “ a fin de semana máis tradicional do entroido, con animación de rúa con música tradicional”, remarcaba o membro da comisión.

Os días 30 e 31 de xaneiro, Noite de Corredoiro e Corredoiro, respectivamente, e xa na fin de semana grande (do 5 ao 10), Venres Infantil, Sábado de Entroido, Domingo de Entroido, Luns de Entroido, Martes de Entroido e Enterro da Sardiña, para rematar o domingo 14 de febreiro con Piñata.

Novidades

Aínda así, tamén se introducen algunhas novidades, como a apertura do desfile infantil do Venres de Entroido  a todos os centros escolares da comarca, potenciando as actividades infantís previstas para esta xornada.  O resto de xornadas manteñen un esquema similar ao doutros anos, con charangas todos os días a todas as horas, que realizarán diferentes percorridos polo centro da localidade que veñen marcados nos programas editados para a ocasión. Sieiro apuntou como novidoso a presenza en Xinzo dunha charanga chegada de Valencia.

O portavoz da comisión tamén anuncia “unha volta” ao desfile do martes de entroido, día grande da festa na vila, que recoñece que nos últimos tempos é “bastante decadente e deberíamos tratar de mellorar”. Insistiu en que debe respectarse “o noso sentimento e tradición”, representados pola figura da pantalla.  Haberá vallas no tramo central do desfile para evitar embotellamentos. As comparsas e carrozas interesadas en participar poden apuntarse ata o 3 de febreiro.

No apartado de loxística que rodea a festa, haberá carpas nas prazas Maior, Oriente e Xoan XXIII, instalarse 15 baños públicos en puntos visibles da vila, reforzarase a recollida de vidro durante as festas e a Deputación facilitará un camión baldeador para manter limpa Xinzo estes días.

Como complemento, o Museo do Entroido estará aberto no seu horario habitual durante os festexos.

Agradecementos

Na súa intervención, o rexedor, Antonio Pérez, anticipouse ás posibles críticas que puidera haber sobre a edición deste ano; “as cousas soas non se fan”, dixo, agradecendo aos membros da comisión o seu traballo por facer posible o carnaval. Tamén tivo un recoñecemento para dous entroideiros históricos da vila xa desaparecidos, Manolo Santana e Toñito Maestro.

Na mesma liña, o edil responsable de Festexos, Luis Miguel Gil, explicou que coa constitución dunha comisión organizativa quixo “abrir ao pobo o facer o entroido”, e sinalou que tan só lles fixo dúas peticións aos organizadores: que o desfile infantil fora de toda a comarca e ter en conta as agrupacións musicais locais nas contratacións.

O Entroido 2016 de Xinzo conta cun orzamento municipal de 55.000 euros, ao que se lle sumarán as posibles subvencións por parte da Xunta de Galicia e da Deputación, así como o recadado pola comisión entre hostaleiros, comerciantes e veciños.