O grupo municipal salienta que a empresa adxudicataria presentara un orzamento a só 9 euros do límite legal para que a obra tivera que saír a concurso público.
Ourense en Común cuestiona o procedemento de adxudicación da construción dun campo de fútbol 5 nos Remedios. “Non denunciamos nada porque non é ilegal. O que cuestionamos é que a empresa adxudicataria fóra a única, das tres que presentaron oferta, en non superar o límite establecido pola lei para que o servizo saíra a concurso público. E que o fixera ademais só por 9 euros menos é escandaloso”. Con este argumento Ourense en Común quere poñer en coñecemento da sociedade ourensá como a futura construción dun campo de fútbol 5 nos Remedios será considerado contrato menor ao non superar o límite dos 50.000 euros que fixa a lei.
“Ao quedar 9€ por baixo de 50.000 euros o contrato pode ser adxudicado directamente a calquera empresario, só están obrigados a aprobar o gasto”. Deste modo Ourense en Común observa con preocupación que “dos tres orzamentos solicitados para a execución do servizo de obra dous superaran a barreira dos 50.000 euros ata case 4.500 euros e a empresa adxudicataria final non chegara a ese límite por só 9 euros”.
A adxudicación foi aprobada na sesión ordinaria do Consello Municipal de Deportes do día 22 de outubro co único voto a favor do Partido Popular.
