Será o 5 de marzo, coincidindo co aniversario do seu nacemento.
O vindeiro xoves 5 de marzo 70 estudantes do IES Ramón Otero Pedrayo de Ourense visitarán a Casa Grande de Cima de Vila en Trasalba (Amoeiro) para celebrar o 127 aniversario do nacemento de Ramón Otero Pedrayo.
Otero Pedrayo, veciño ilustre de Trasalba, naceu na ourensá rúa da Paz, o 5 de marzo de 1888. Nesta xornada celébrase a festividade de San Hadrián, nome escollido polo escritor para designar a algúns dos protagonistas das súas novelas máis coñecidas.
Pedrayo foi profesor do actual IES Ramón Otero Pedrayo e nel realizou os seus estudos secundarios sendo neno, é por iso que a Fundación Otero Pedrayo convidou aos mozos que actualmente cursan os seus estudos neste centro educativo para que se achegasen ás terras de Amoeiro e coñecesen a figura e a obra do patriarca das Letras Galegas.
Nesta ocasión, a cuarta na que se celebra a actividade, estudantes de 4º de ESO terán a oportunidade de coñecer a que fora a casa familiar do escritor e darán un pequeno paseo por Trasalba lendo fragmentos de “Arredor de sí”, de “Pantelas home libre” e de “Bocarribeira”.
Para rematar a xornada, os rapaces asistentes e os seus profesores soprarán as velas da torta de aniversario e recibirán un lote de libros editados pola propia Fundación.
