Manuel Baltar e o coordinador da edición, Jesús de Juana, presentaron o libro no Centro Cultural “Marcos Valcárcel”.
O segundo volume da obra «Galegos de Ourense» recolle as biografías de ourensáns ilustres ao longo da historia. Nesta segunda entrega figuran nomes como Ruiz de Padrón, Saco y Arce, Parada Justel, Alexandre Bóveda, Filomena Dato, Eduardo Barreiros, Carlos Casares, Jaime Quesada, Virxilio, Paz Nóvoa, Arturo Noguerol, Quiroga Palacios, José Velo, Luis Fábrega Coello, Eleuterio González, Alfonso Pazos Cid, Vázquez Gulías, Conde Fidalgo, Manuel Prego de Oliver, Delgado Gurriarán e Lauro Olmo.
Segundo explicou Manuel Baltar, “este proxecto editorial recolle a biografía daqueles persoeiros que destacaron pola súa ourensanía, persoeiros que teñen a característica común de ter contribuído a ‘facer Ourense’ e levar o nome desta provincia nas diferentes disciplinas científicas, culturais ou sociais nas que desenvolveron a súa actividade profesional ao longo das súas vidas”.
O presidente provincial subliñou que neste segundo volume figuran “dezanove referentes máis da ourensanía, biografías froito do traballo e estudo de doce recoñecidos investigadores, entre os que se atopan os coordinadores deste libro: Jesús de Juana, Julio Prada e Domingo Rodríguez Teijeiro, membros da Facultade de Historia da Universidade de Vigo no Campus de Ourense”.
Aparece este libro logo de que en 2014 a Deputación de Ourense subliñase a vixencia da obra de persoeiros como o Padre Feijóo, cumpríndose douscentos cincuenta anos do seu pasamento, ou Eduardo Blanco Amor, “ano no que tamén lle outorgamos a Medalla de Ouro da provincia, a título póstumo, a Marcos Valcárcel, que pon nome ao Centro Cultural dependente desta institución. Tres nomes que serven para albiscar a pegada dos fillos desta terra de xente traballadora, creativa e emigrante”, dixo Manuel Baltar, quen animou a seguir nesta andaina “enchendo de máis biografías senlleiras un vindeiro volume deste proxecto editorial, que reforza o sentimento de Ourensanía que compartimos”.
Pola súa banda, Jesús de Juana agradeceu á Deputación de Ourense e ao seu presidente a boa acollida deste proxecto e a súa aposta firme por levalo adiante, e destacou que o labor da Facultade de Historia de Ourense “é a investigación pero tamén a divulgación, pois é necesario dar a coñecer os estudos que se fan sobre a nosa historia tanto recente como doutras épocas, para salientar o traballo de persoeiros senlleiros de Ourense”.
[Fotografía de Alberte Paz]
