Dous goles do xogador, ao comezo e ao final do encontro, déronlle a vitoria ao Sala Ourense para rematar o ano como líder.

Tizón de principio a fin

O Sala Ourense remata a primeira volta, e o ano, como primeiro na Terceira división de fútbol sala.

A sufrida vitoria desta xornada fai que o conxunto ourensán manteña os dous puntos de vantaxe sobre o segundo clasificado, o Pazos de Borbén.

No que se refire ao partido desta xornada, os homes de Kike García recibían nos Remedios ao Coruña.

Nada máis comezar o encontro Tizón anotou o primeiro gol do encontro. O que parecía estar encarrilado, mudou a un partido moi trabado por parte dos xogadores rivais. Antes do descanso, os herculinos facían o gol que devolvía as táboas ao marcador.

Na segunda metade máis do mesmo. O sala Ourense que quería propoñer bo xogo, pero que llo impedía un conxunto coruñés que chegou a Ourense coa intención de sacar un punto.

Pasaban os minutos e os ourensáns tentaban un gol que non chegaba. Os visitantes atascaron o xogo dos locais ata o último suspiro do encontro. A acumulación de faltas fixo que a sexta do segundo tempo, do Coruña, levara a Tizón aos 10 metros a falta de 21 segundos para rematar o partido.

O máximo goleador da Liga non perdoou e fixo o segundo da tarde logrando que se quedaran en Ourense os tres puntos. Tizón suma 18 goles na primeira volta.

Clasificación
En canto ao equipo, 10 vitorias e dúas derrotas para sumar 30 puntos. Segundo marcha o Pazos de Borbén con 28 puntos, e terceiro A Estrada con 27. O Sala Ourense poclámase, deste xeito, campión de inverno.

Carballiño
A vitoria do Carballiño na pista do Mosteiro Bembrive fai que suban un punto na táboa e se sitúen décimos con 11 puntos.