Como cada ano Laza prepara un amplo programa de Entroido, no que non faltará a estrea dos novos peliqueiros, o Luns Borralleiro ou o gran desfile de comparsas o Martes de Entroido.
Ningún dos tres vértices do triángulo máxico falta xamais á súa cita co Entroido. Nesta edición do 2015 Laza ten preparada unha ampla oferta de actividades, para que a festa non pare do 12 ao 22 de febreiro.
Logo do Xoves de Comadres e o Venres de Folión, o 14 de febreiro conmemorarase na localidade o Sábado de Cabritadas, coa fariñada pola tarde nas distintas rúas da vila; e a cabritada dos mozos pola noite.
O Domingo de Estrea comezará pola mañá cedo coa estrea dos peliqueiros, o saúdo á sáida da misa e reparto de bica. Pola tarde será o momento do desfile de carrozas.
O Luns Borralleiro pola mañá celebrarase a farrapada nas rúas e praza da Picota, e pola tarde será a baixada da Morena de Cimadevila acompañada das formigas, toxos e cobelleiros.
O 17 de febreiro, Martes de Entroido terá lugar a saída dos peliqueiros veteráns pola mañá; e pola tarde o desfile de carrozas, lectura do testamento, enterro do Entroido e loito dos peliqueiros.
Por último, a festa remata en Laza co Domingo de Piñata, o 22 de febreiro, o último día no que está permitido vestir de peliqueiro. Así mesmo, todos os días estarán amenizados por actuacións musicais coas orquestras, charangas e demáis músicos improvisados que nos visitan.
