A Plataforma de afectados, expectante ante a entrada en vigor o 1 de abril do Plan Estratéxico de Abordaxe desta doenza, que facilitará novos medicamentos.
As reivindicacións dos enfermos da hepatite C trouxeron a primeiro plano unha enfermidade “silenciosa e silenciada”, como eles mesmo a definen. A hepatite C é unha doenza infecciosa que afecta principalmente ao fígado. A infección aguda é polo xeral asintomática, pero a infección crónica pode producir lesións no fígado e a longo prazo orixinar cirrose (entre un 10 e un 20% dos pacientes) e cancro de fígado (nun 5% dos casos). A hepatite C é a causa principal de transplante de fígado; con todo, o virus adoita recorrer despois do transplante.
A hepatite C contráese principalmente mediante o contacto con sangue contaminado asociado co consumo de drogas por vía intravenosa, o uso de instrumental médico non esterilizado e as transfusións de sangue non testadas previamente. No momento actual non existe vacina contra a hepatite C.
Ata o de agora, había tratamentos pero non tan eficaces como os novos antivirais aprobados en 2014, que conseguen a curación en máis do 90% dos casos, como Harvoni (unha combinación de sofosbuvir e ledipasvir), Vikerax e Exviera (unha combinación de catro principios activos: paritaprevir, ritonavir, dasabuvir e ombitasvir). “Antes o tratamento aplicábase a todos os tipos pero non valía para todos, e os efectos secundarios eran superfortes, en particular do interferón”, sinala Olga Suárez, membro da Plataforma galega de afectados pola hepatite C.
Asemade, só se trataba aos pacientes máis graves: “aos enfermos a punto de palmar, literalmente, a transplantados, a xente que se reinfectou pola absurdez do Ministerio de Sanidade de ‘prefiro transplantarte e despois che dou medicamento’, co cal unha vez que se transplanta se non quitamos o virus previamente ese fígado volve danarse”, relata Suárez.
Foi correrse a voz da eficacia da nova medicación e empezar a confluir os afectados en plataformas. Con peches, protestas na rúa e levando as súas reivindicacións aos parlamentos e aos xulgados, a presión deste colectivo levou ao Ministerio de Sanidade a aprobar o Plan Estratéxico para a Abordaxe da Hepatite C, que se implementará a partir do vindeiro 1 de abril.
En concreto, o Plan aconsella tratar con distintas combinacións de medicamentos a todos os pacientes con fibrose en grao F2, F3 e F4, ademais dos FI nalgunhas circunstancias, o que supón arredor de 52.000 persoas dun total de 95.000 diagnosticados. Porén, a incidencia da enfermidade é maior. Segundo estimacións da AEEH, Asociación Española para o Estudo do Fígado, entre o 1 e o 2% da poboación española está infectada co virus da hepatite C (entre 3.300 e 6.600 polo tanto, na nosa provincia).
O Ministerio estableceu un teito de gasto de 727 millóns de euros e acordou cos responsables de saúde das comunidades autónomas un Plan de Financiación para garantir o acceso a estes medicamentos de forma inmediata. O custo medio do tratamento por paciente rondará, xa que logo, os 14.000 euros.
“Antes de chegar ao acordo houbo moito pranto, bágoas e sufrimento de por medio, chegar aquí non foi fácil”, recalca Olga, que ten depositadas as esperanzas neste Plan estratéxico, aínda que con cautela. “Necesitamos ver que iso realmente se cumple”. O seu compañeiro Raúl Auñón engade que a espera “faise eterna; só saber que cada día están morrendo 14, 15 persoas en toda España…”
Con todo, reclaman que o tratamento chegue xa a todos os pacientes, tamén á poboación reclusa. “Aos que están moi malos vanlle quitar a enfermidade pero vanlles quedar secuelas, o lóxico é pensar que se llo damos á xente recén infectada imos evitar novos contaxios e que esa enfermidade avance co cal o gasto sanitario vai ser menor”, sinala Olga Suárez. Apuntan, ademais, que a xustificación económica lles dá a razón: “a longo prazo vai saír máis barato porque curar un paciente non é o mesmo que estar a tratalo toda a vida, con receitas, que se logo un transplante…”, remacha Auñón. Outro afectado, Jesús Miguel de la Caba, diríxese tamén a outras administracións: “ao presidente da Deputación pedímoslle que igual que reparte 400.000 euros ao fútbol, os enfermos da Plataforma tamén necesitamos 400.00 euros para que os poña a disposición da farmacia do hospital para medicamentos”.
No Paseo da Saúde
A Plataforma estará presente con stand no Paseo da Saúde organizado polo Concello entre o 8 e o 9 de abril. Os interesados poden contactar con ela no seu Facebook (Plataforma galega de afectados pola hepatite C) ou no correo afectadosvhsgalicia@gmail.com. “Nós (a Plataforma) desapareceremos no momento en que desapareza a enfermidade, senón desaparece imos estar aí dando guerra”, remata Olga.
