No pleno de abril, o grupo municipal nacionalista levará a pleno unha proposta para que se constrúa na Carballeira un campo de fútbol tendo en conta que no PXOM do ano 1986 -o actualmente vixente- reservánbanse 10.000 metros cadrados de solo dotacional para uso deportivo-recreativo.
A voceira do BNG, Susana García, explicaba que o Concello debe facer as xestións necesarias para pór os terreos a disposición da Federación Galega de Fútbol aproveitando que o seu novo presidente , Rafael Louzán, anunciou que sería Ourense o lugar onde quería construír o primeiro campo de fútbol. «Debemos aproveitar esta oferta porque Ourense ten carencias de infraestruturas deportivas e este barrio, e tamén os colindantes, carecen de instalacións próximas», resaltan os nacionalistas.
Precisamente a estas carencias facía mención o presidente da AVV Carlasca, Arturo Rodríguez, quen acompañado de varias veciñas lembraba que se presentaran alegacións ao PXOM que actualmente se tramita para que se mantivera o solo dotacional que aparecía na normativa do 1986.
Arturo Rodríguez criticaba que os nenos e mozos da Carballeira e As Camelias eran nómadas do deporte porque tiñan que desprazarse a Oira, Santa Cruz de Arrabaldo ou Velle para poder xogar. Por isto creouse a Plataforma Campo de Fútbol A Carballeira na que están representadas as asociacións veciñais e os clubes deportivos que están recollendo sinaturas para reclamar que se faga esta instalación.
No período de exposición do PXOM, o BNG apoiou as alegacións veciñais mais prevendo que a aprobación definitiva se poida demorar no tempo e que hai unha oferta concreta para que Ourense conte con outra instalación deportiva queren que a corporación apoie dar un paso máis e empezar os trámites para pór os terreos a disposición da Federación e das Administracións que asuman a construcción deste campo de fútbol.
