En Ourense instalará este xoves un photocall diante do Centro de Maiores, na rúa do Paseo.
A Fundación Galicia Obra Social (Afundación) celebra este xoves, 1 de outubro, o Día Internacional das Persoas Maiores, instituído pola ONU en 1990. En 2015 esta conmemoración dedícase á «sostibilidade e inclusión das persoas maiores na contorna urbana», tendo en conta que se está acelerando o proceso de concentración da poboación en áreas urbanas e que para 2050 se espera que as persoas de máis de 60 anos superen o 20 % da poboación mundial.
Afundación súmase a este obxectivo, dentro do seu proxecto de envellecemento activo, cun acto reivindicativo para dar visibilidade ao papel dos maiores. Deste xeito instalará un photocall, en horario de 11.00 a 13.00 h. e de 17.00 a 20.00 h., nas súas sedes, no que convidan á cidadanía a participar facendo fotografías sostendo mensaxes que apoien a campaña.
En Ourense, o photocall instalarase diante do Centro de Maiores Afundación e contará coa presenza ás 11.45 h. do alcalde da cidade, Jesús Vázquez, do vicepresidente da Deputación, Rosendo Luis Fernández, e do patrón de Afundación, José Luis Jiménez.
