Un novo fogo cruzado chega ao Concello de Ourense. Calquera motivo serve para provocar unha faísca no consistorio municipal, nun mandato no que poucas veces se puxeron de acordo entre goberno e oposición.
Nesta ocasión, o novo conflito ten que ver co Plan Xeral de Ordenación Municipal (PXOM).
O concelleiro de Urbanismo, José Cudeiro, xa pediu o expediente a Intervención para continuar coa tramitación de cara á aprobación do PXOM. Nin Asesoría Xurídica primeiro, nin Intervención agora, emitiron informe algún sobre o expediente despois de estar máis de tres meses en cada un dos despachos.
Unha vez devolto o expediente pasará ao xefe de servizo de planeamento -será o funcionario como xefe de servizo da Concellaría- quen dirá se se ratifica ou se engade algunha outra cuestión. En caso de ratificarse implicaría a súa aprobación provisional do plan por decreto do concelleiro (ao delegar o alcalde). Entón produciríase a firma do decreto da aprobación provisional para remitir o expediente á Xunta, que contará con tres meses para realizar o informe preceptivo vinculante. Co que diga o ente autonómico correxiranse cuestións ou elevarase ao pleno, que será o competente para resolver as alegacións e aprobar definitivamente o plan; ou adoptar calquera outra determinación que considere oportuna.
Cudeiro explicaba que seguen este procedemento xa que fan caso ao “informe do Consello consultivo” polo que “procederei a aprobar provinsionalmente o documento”. Aínda que asegurou que “nesta corporación non será posible aprobalo”.
“Ao ter o expediente devolto, o xefe de servizo de planeamento terá o informe e a continuación realizarase o drecreto de aprobación provisional, salvo que o informe do xefe de servizo diga o contrario”, puntualizaba Cudeiro, que proseguía “seguimos o trámite que determina a lei e o Consello consultivo xa que é un acto de trámite, así que o expediente avanza para ir gañando tempo para que a vindeira corporación teña o informe da Xunta”.
O edil popular descoñecía por qué os funcionarios non emitiron o informe, aínda que aseguraba que non son vinculantes, “hai que pedilos, pero emitidos fóra de prazo, non se ten porque ter en consideración”.
Ademais, o titular de Urbanismo criticou a actitude tanto de Barquero, que “estivo dous anos nunha comisión de seguemento e non propuxo nada”, dixo, e a Democracia Ourensana, con quen asegurou que se reuniu moitas veces pero nas que “nunca estiveron os concelleiros”.
DO
O grupo da oposión con máis representación na corporación municipal, Democracia Ourensana, tamén falou sobre o tema. O seu líder, Gonzalo Pérez Jácome, aseguraba que o Concello “tentará aprobar o PXOM provisional á marxe do pleno”. Para Jácome, isto ten unha legalidade “xurídica moi dubidosa”, que probablemente acabaría “tirado polos tribunais”.
Segundo o voceiro de DO, a actuación do PP é irrelevante “porque é soamente a provisional”, a definitiva ten que aprobala o pleno e “desde logo, un plan cheo de pelotazos é moi difícil que DO o aprobe”.
“Así que se está enganando á poboación ao asegurar que se aprobará o PXOM. En tal caso aprobarase o requisito previo que é o plan provisional pero que non serve de nada xa que se non se conta con apoios sería difícil aprobar o plan definitivo”, sentenciaba.
PSOE
“O PP pretende aprobalo pola porta de atrás”. Así comezaba a súa rolda de prensa o portavoz dos socialistas no Concello de Ourense, José A. Vázquez Barquero, que auguraba que o PXOM “acabaría no xulgado”.
Para Barquero é sospetoiso que Cudeiro “continúe empecinado na aprobación dun plan orfo de informes municipais. El quere aprobalo de maneira unipersoal ao marxe do pleno”.
O socialista, ao igual que o edil popular, descoñecía por qué os técnicos municipais non emiten o seu informe, uns informes que considera “imprescindibles” xa que marcarán “o desenvolvemento urbanístico nos vindeiros 20 ou 25 anos”. Ademais, non daba crédito á certeza do popular cando aseguraba que para aprobar un plan de urbanismo non son viculantes os informes da asesoría xurídica e do interventor municipal. Por iso, reclamáballe ao alcalde que “poña fin a este despropósito, que teña sentido común e non aprobe un plan de costas á legalidade e á cidadanía”.
OUeC
Ourense en Común tamén valoraba os pasos que desde o PP queren dar cara o novo PXOM. Desde a formación cualificaban de “alarmante e de extrema gravidade” as intencións dos populares. Criticaban duramente ao concelleiro de Urbanismo, José Cudeiro, ao querer, según OUeC, “devolver a xestión urbanística da cidade aos especuladores inmobiliarios”.
“Tuneou o PXOM, introduciu centos de modificacións, con aumentos salvaxes no aproveitamento lucrativo do chan, e agora vai aprobalo facendo trampas, de costas aos grupos da corporación, de costas á cidadanía e poñendo a Ourense nun futuro urbanístico incerto, inseguro, problemático e ilegal”, aseguraba o portavoz da formación, Martiño X. Vázquez.
Para o edil, o Partido Popular busca aprobar o PXOM “en solitario e con todos os informes en contra”, e apuntan a Cudeiro como “o gran responsable de que Ourense teña a día de hoxe un plan do ano 1986”, xa que tamén era concelleiro, no goberno de Manuel Cabezas, cando a xustiza tumbara o plan de 2003. Critica, ademais, que o concelleiro popular secuestre o debate plenario ao prescindir “dos informes da Secretaría e a Intervención municipal” para aprobar o Plan “a porta pechada”.
