Celebrou a súa primeira reunión do novo período político con 27 puntos na orde do día e a súa voceira, a deputada Montse Lama, deu conta dos acordos adoptados.
A Xunta de Goberno da Deputación de Ourense aprobou a concesión de axudas para concellos e entidades por importe de máis de 900.000 euros, que irán destinadas principalmente aos ámbitos das infraestruturas, servizos sociais, formación, cultura e deporte da provincia de Ourense. A Xunta de Goberno integrada por Manuel Baltar, Rosendo Fernández, Jorge Pumar, Pablo Pérez, Montse Lama, Plácido Álvarez, Ana Villarino, Manuel Doval e Juan Anta, celebrou a súa primeira reunión do novo período político 2015-2019, con 27 puntos na orde do día, sendo designada voceira da mesma a deputada de Transparencia e Goberno Aberto, Montse Lama, quen foi a encargada de dar conta dos acordos.
No que atinxe á cooperación co Campus de Ourense, a Xunta de Goberno ratificou o convenio de colaboración entre a Universidade de Vigo e a Deputación de Ourense para o desenvolvemento de actividades de difusión cultural no Campus de Ourense. Convenio polo cal o goberno provincial achega á Universidade de Vigo a cantidade de 165.000 euros para o financiamento de actividades culturais, educativas e de investigación.
En canto ás axudas de ámbito cultural, servizos sociais e para a concesión de bolsas internacionais, a Xunta de Goberno aprobou para a realización de festivais, ciclos, mostras ou actividades análogas correspondentes a 2015 a achega de 79.833 euros, mentres que para asociacións e fundacións e proxectos de servizos sociais destínanse un total de 255.000 euros. E no que atinxe ás bolsas internacionais, un total de 10, son para desenvolvemento de actividade formativa en Portugal, seis, e Reino Unido, catro.
Tamén aprobáronse as programacións anuais das escolas de Danza e de Gaitas da Deputación de Ourense. Como novidade para o vindeiro curso, na Escola de Danza inclúese un desconto do 60 % para familiares dos alumnos matriculados, e na Escola de Gaitas dáse a posibilidade do pago fraccionado en 3 meses.
Para os concellos da provincia de Ourense, a Xunta de Goberno aprobou axudas nos ámbitos referidos a infraestruturas, actividades culturais e deportivas e equipamentos. En concreto, a Cortegada destina 50.000 euros para equipamento termal do balneario; a Xinzo de Limia, 25.000 euros para gastos de sostemento do Conservatorio; a Celanova, 10.000 euros para obras de mantemento na escola infantil; a Muíños, 50.000 euros para obras de acondicionamento e equipamento do centro BTT Serra do Xurés; ao Concello da Bola, outros 50.000 euros para arranxo de vías municipais, e a Baltar e Beariz, 15.000 e 12.000 euros para actividades Culturais, respectivamente.
En canto ás axudas para asociacións as principais son: 30.000 euros para Aixiña, para o seu servizo de transporte do Centro de Día de parálise cerebral; 15.000 euros para a Fundación Terra de Celanova para a protección de discapacitados psíquicos; 75.000 euros para a residencia de maiores de Lobeira; 50.000 euros para o Consello Regulador da D.O. Ribeiro, para equipamento tecnolóxico; e 86.000 euros para actividades e festivais de Sarabela Teatro.
