A conselleira de Traballo e Benestar, Beatriz Mato, mantivo unha xuntanza co alcalde de Vilamarín, Amador Vázquez.
Nese encontro en Santiago, Mato comprometeuse no encontro a retomar e actualizar o proxecto do centro de maiores o próximo ano. De feito, a conselleira anunciou que os orzamentos de 2016 incluirán unha partida plurianual para o inicio das obras.
Será un centro destinado á promoción da autonomía persoal, xa que a titular de Benestar destacou que este tipo de servizos poderán ofertarse a través da carteira de servizos para autónomos que forma parte do novo modelo de atención que está a desenvolver a Xunta no eido dos servizos sociais. Con esta modificación, estase a pasar do actual modelo, que acredita os propios centros, a un no que se acreditan os distintos servizos que pode prestar unha determinada instalación. Deste modo, poderán beneficiarse de determinados servizos non só os usuarios dos centros, senón tamén os potenciais demandantes deste recurso en concreto que habiten no contorno.
Mato destacou a importancia de poñer a disposición das persoas maiores servizos de calidade e, deste xeito, indicou que a posta en marcha de prazas públicas para este colectivo é unha das prioridades da Xunta, lembrando que Galicia é a segunda autonomía de todo o Estado con maior porcentaxe de servizos profesionais.
